komski kuno - Tuyot Na'ng Damdamin (Silent Sanctuary cover)

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

Hinde, wala namang matinong tao na kukuha sa 'kin para kumanta dahil ako lang naman ang makakaatim na makarinig sa aking boses. Pero ang totoo, mahilig lang talaga ako kumanta, kahit sablay-sablay ang tono. Gustung-gusto kong sabayan ang bawat pagbigkas ng mga paborito kong banda sa lyrics ng kanilang mga kanta.

Mahilig ako sa musika. Ewan, basta pagkagising ko sa umaga'y binubuksan ko kaagad ang aking computer para makapagpatugtog. Nakahiligan ko ang tunog ng gitara, ang pintig ng drums, at ang emosyon na nililikha ng himig, ritmo at lyrics. Naging paborito ko ang malulungkot ng mga kantang inaawit ng mga bandang may pagka-rock o punk na impluwensya dahil para bang umiiyak ang electric guitar sa bawat kalabit sa strings. Kumakabog ang dibdib ko sa tuwing papaluin ang drums na para bang pinapatibok nito ang aking puso. Haay, sarap sigurong magkaroon ng isang banda.

Kapag nakakarinig ako ng kantang gusto ko ay nangangati ang dila kong sambitin at sabayan ang mga parteng alam ko ang salita. Dahil parang kulang ang pakikinig, at mas madarama mo ang awit kung ito'y iyo ring kakantahin.

Kaya nga parang hindi ko rin gustong  magkaroon ng portable mp3 player dahil maaasar lang ako kapag gusto kong kumanta ngunit nakakahiya, lalo na kung ako'y nasa bus o dyip. Dahil kapag nasa bahay ay malakas akong kumanta. At wala akong pakialam, hehe. Madalas nga akong napagsasabihan na hinaan ko ang volume ng pagpapatugtog ko at pagkanta na rin=)